الحلقة الأخيرة ....... بس ده مش دندن
ـ الو.. ايوة يا ماما فيه ايه؟
ـ دندن هرب تاني .. وبصي بقي مش هيدخل البيت تاني .
ـ ليه يا ماما بس ... انتو كده مبتحبوش الحاجات اللي بحبها انا خلاص جاية في الطريق...
ـ ماشي بس لينا كلام برده ،، وقفلت السكة
ماهي ليها حق برده الواد ده زودها اوي ، بس لما اشوفك يادندن الكلـــــ ..... ما علينا ...
روَحت البيت ومحطتش في بالي اني ادور عليه ،، اكيد عرف الطريق للبيت .... هوه مش غبي خالص ولما بيغيب بيرجع يعني هقلق عليه ليه ؟... اه هوا يعني بيرجع خاسس شوية ااقصد شويتين بس يومين وبيعوض كل الي فاته
عدي يوم واتنين وتلاتة وانا ولا علي بالي وواثقة من رجوعه الأكيد ...حد يسيب مامته كتير كده يا دندن.....بس واحشني اوي ابن الإيه....... وبدأت رحلة البحث عن الافندي،، سي دندن
اتمرمطت من سطوح لسطوح واللي كان بيقول عليا هايفة واللي يقول فاضية واللي يعرض خدماته وتليفوناته والذي منه .... حاجة تكسف عدي يوم تالت ورابع ... وبعدين ....... افقد الامل .... بدأت أفقد اعصابي واتنرفز ...... حسوا بيا كل اصحابي واسرتي ... ماهو اصل دندن معايا من سنتين إلا شهرين ،، عارفين اني بحبه اوي .......
اصحابي قالولي خلاص هاتي واحد غيره ،،
واللي يقوللي عوضك علي الله
واللي يقول والي يعيد واللي يزيد.......
الايام بتعدي ولا حس ولا خبر ....... عدي كتير وقلبي وجعني من بعده مكنتش بنام ......كنت مجنده كل اطفال المنطقة ناقص اوزع صورته ومكافأة مجزية لمن يعثر علي المحروس سي دندن
في يوم صحيت الصبح علي اختي بتصحيني بتقوللي ..
ـ قومي قومي
ــ ايه فيه ايه ؟
ـ دندن رجع شايله ابن الجيران بره
ـ بجد ؟؟؟؟؟؟؟؟؟ كنت حاسه انه هيرجع ....... وطلعت علشان استقبله
.... بصيت عليه واتفزعت من المنظر اللي شفته .... بس ده مش دندن ؟؟؟
هوا عامل كده ليه ... غير انه خاسس ولونه كده مش اللي هوه ........وبصراحة خفت منه او خفت امسكه ... قربت منه قلتله ........دندن ....دندن ...دندن ......... اترمي علي الارض قدامي ومنطقش ... دندن ...... دندن .... مش قادر يقف ... رجليه فيها نزيف ودماغه كمان بتنزف .... من ايه ده ؟ اكيد عربيه ضربته او كلب عضه او خناقة قطط متوحشة ........طيب يشرب لبن وبعدين اوديه لدكتور ،، احنا لسة بدري ... مش قادر يشرب لسانه متعور ....... حالته صعبة ،، مش عارفة اعمل ايه؟ هروح الشغل وارجع اجيبله مضاد حيوي وبكره اوديه للدكتور لو متحسنش .....
ـ الو ايوة ,, ماتجبيش معاكي مضاد حيوي...
ـ ليه؟
ـ بابا جاب من الصيدلية اللي تحت البيت
ـ اوك ماشي وكله تمام؟
ـ اه كله تمام ... هتتاخري ؟
ـ لأ انا في السكة اهه.. مسافة السكة ...سلام
يااااااااااااااااااااااااااااه
فرحت اوي إن بابا بيهتم بالقط بتاعي وكنت سعيدة جدا ...
حلو اوي ان اهالينا مهما كبرنا يعاملونا كإننا لسة اطفال
قعدت افكر بقي انه اول ما يخف من تعبه اروح جري اوديه لعروسته اكيد مامتها هتتصل وتقوللي ايه اخبار العريس ومش هينفع اقولها عللي فيه .. خلاص يومين وكله يبقي إشطه
اول ما دخلت نديت عليه .... دندن ..دندن... مردش عليا
فين دندن يا ماما ؟ فين دندن يا بابا ؟ فين دندن جماعة ؟
ومين اداله المضاد الحيوي وجبتوه من اي نوع؟
محدش بيرد ليه ؟؟؟؟؟؟ ردوا علياااااااااااااااااااااااا
دندن مات
ملحقش يتجوز
معملتلوش عيد ميلاد
مات من سنة ولسة فاكرة كل حاجة معاة
دندن .... للأبد انت وبس مفيش قط تاني هيسكن معايا
هناك ١٦ تعليقًا:
لا حول ولا قوة إلا بالله يا خير الحمد الله على كل شئ بجد أنا زعلت أوى على دندن وفطست على نفسي من الضحك من طريقة تعبيرك للكلام اللى بتكتبيه بجد بجد تنفعى كاتبة قصص أطفال 10/10 أنا بتكلم جد مش بهزار طريقة كتابتك للقصة سهلة جدا و سهلة الفهم بجد من قرايتى للقصه شكلك كده بتحبى الأطافل اوى اوى
جزاك الله كل خير
يا عين امك يا خويا
طب و الله بجد زعلت قوى
:(
الحمد لله على كل حال
و انا موافق على كلام الاخ اللى فوقيا ده
انتى تنفعى تكتبى قصص اطفال هايله
تحياتى يا سكر
حرام عليكي يا شيخه بعد كل اللي فات ده وعماله تحببينا فيه وتعلقينا معاكي وهو ميت من سنه
عموما معلش انا لله وانا اليه راجعون لما اي حد بني ادم او حيوان يموت لازم نقول كده
وعموما اتمنى تلاقي حد يعوضك عن فقدان الصديق الجميل دندن وعموما يعني اكيد في ناس كتير تعرف رنة موبايلك وممكن تاكل جبنه رومي وتشرب لبن وتسمع كلامك
يعني هايتعبوا عشانك قوي
اعتقد في الف قط يتمنوا اللي هو كان فيه
وزي الأفلام العربي القديمه ان سعاد هي اللي جنت على نفسها لما باعت الحب الحقيقي وجريت وراء الأوهام
معلش اصلي اتفرجت على فيلم عربي قريب
عموما متزعليش على دندن وان كنتي فقدتي دندن فاحنا كلنا دندن آآ قصدي كلنا اصدقائك
سلااااااااااااااااااااااام
كل ده عشان قط
امال لما تحبى هتكتبى ايه عن حبيبك
:)
ميميييييييييييييييييييي
ازيكي يا قمرة؟
أسفة على التأخير..يا صديقتي
أنا للأسف مش هقدر أتعاطف معاكي لأني مش بحب القطط مع إني وانا صغيرة كنت بحب ألعب بيهم أوي وكنت بشيلهم من رقبتهم..وعندي صور وأنا بلعب مع القطط كتير
بس حصل كذا موقف كدة..خلوني أكرههم
وكمان كنتي بتنيميه جنبك؟
سيبك انتي...انتي طلعتي كارثة
بجد عجبتني طريقة كتابتك أوييييييييييي
ربنا يصبرك على دندن
ونفرح بأولادك بقى يا جميل
:)
نوني
الحمد لله الذى عافانا من كتابات غيرنا
السلام عليكم هذا الحال مع حيوانات
كيف الحال مع من نرتبط بهم من بشر
تحياتى
انا قريت من اول ما جالك هدية في عيد مميلادك لغاية ما تنقل للرفيق الاعلى
انا عارف و الله شعورك تجاهه عشان عندي عن ااش برده, بس ده شكله هوا اللي هيموتني الاول :)))
ان شاء الله يجيلك دندن جديد و تحبيه و يملا فراغ دندن القديم
و اشكرك على الزيارة
ميمي
=====
الكومنت اللي بتكتبيها عندي ليه مش بتخشي بالاكاونت بتاعك؟
انا كدة مش متاكد انه انتي اللي بتعلقي عندي
وسلام مش ختام
فكرتيني باللذي مضي
بس كان ارنب
سميتو بني بني
وكنت بعامله علي انه قطه لدرجه انه بقي اد القطه فعلا وكنت بحميه وبالشامبو
ولما عمره كبر اضطرت ماما انها تدبحه عشان ميموتش
وطبيعي مقدرتش اكله بعد مدبح واتهعمل عليه ملوخيه كمان
يالله مش مهم تعيشي وتفتكري
مدونتك حلوه واهلا بيكي عندي في اي وقت
انا مبرمج اوفيس بوي يعمل شاي وقهوه في المدونه للزوار
تحياتي
هى المدونة معمولة لدندن ؟
ميمي
اولا ميرسي جدا على كلامك الجميل اللى قولتيه في مدونتى و طبعا ليا الشرف في صداقتك
بالنسبة لدندن فأنا نازل بكرة اجيب قطة لاختى الصغيرة انا بحب القطط الاناث اكتر من الذكور .. ارق و مطيعة اكتر
الحقووونييييييييي...
انا ميمي والمدونة حد سرقها مني لا عارفة ادخل ولا عارفة اضيف ... حتي البروفايل بتاعي اتغير منه حاجات ،، ارجوكم اللي يلاقي حل ليا يبعتلي علي gamna2002@hotmail.com
انا خلاص بعيط إهئ إهئ
اعملي واحد جديد بقى و خلاص
و انقلي المواضيع
يلا مستنيينك
هههههه
على فكرة اسلوبك حلو اوى بجد
كل سنة وانتى طيبة
تحياتى
انا لله وانا اليه راجعون ؟
ولا حول ولا قوه الا بالله
البقاء لله
الله يرحمه
دن دن
إرسال تعليق