الحلقة الأخيرة ....... بس ده مش دندن

ـ الو.. ايوة يا ماما فيه ايه؟

ـ دندن هرب تاني .. وبصي بقي مش هيدخل البيت تاني .

ـ ليه يا ماما بس ... انتو كده مبتحبوش الحاجات اللي بحبها انا خلاص جاية في الطريق...

ـ ماشي بس لينا كلام برده ،، وقفلت السكة

ماهي ليها حق برده الواد ده زودها اوي ، بس لما اشوفك يادندن الكلـــــ ..... ما علينا ...

روَحت البيت ومحطتش في بالي اني ادور عليه ،، اكيد عرف الطريق للبيت .... هوه مش غبي خالص ولما بيغيب بيرجع يعني هقلق عليه ليه ؟... اه هوا يعني بيرجع خاسس شوية ااقصد شويتين بس يومين وبيعوض كل الي فاته

عدي يوم واتنين وتلاتة وانا ولا علي بالي وواثقة من رجوعه الأكيد ...حد يسيب مامته كتير كده يا دندن.....بس واحشني اوي ابن الإيه....... وبدأت رحلة البحث عن الافندي،، سي دندن

اتمرمطت من سطوح لسطوح واللي كان بيقول عليا هايفة واللي يقول فاضية واللي يعرض خدماته وتليفوناته والذي منه .... حاجة تكسف عدي يوم تالت ورابع ... وبعدين ....... افقد الامل .... بدأت أفقد اعصابي واتنرفز ...... حسوا بيا كل اصحابي واسرتي ... ماهو اصل دندن معايا من سنتين إلا شهرين ،، عارفين اني بحبه اوي .......

اصحابي قالولي خلاص هاتي واحد غيره ،،

واللي يقوللي عوضك علي الله

واللي يقول والي يعيد واللي يزيد.......

الايام بتعدي ولا حس ولا خبر ....... عدي كتير وقلبي وجعني من بعده مكنتش بنام ......كنت مجنده كل اطفال المنطقة ناقص اوزع صورته ومكافأة مجزية لمن يعثر علي المحروس سي دندن

في يوم صحيت الصبح علي اختي بتصحيني بتقوللي ..

ـ قومي قومي

ــ ايه فيه ايه ؟

ـ دندن رجع شايله ابن الجيران بره

ـ بجد ؟؟؟؟؟؟؟؟؟ كنت حاسه انه هيرجع ....... وطلعت علشان استقبله

.... بصيت عليه واتفزعت من المنظر اللي شفته .... بس ده مش دندن ؟؟؟

هوا عامل كده ليه ... غير انه خاسس ولونه كده مش اللي هوه ........وبصراحة خفت منه او خفت امسكه ... قربت منه قلتله ........دندن ....دندن ...دندن ......... اترمي علي الارض قدامي ومنطقش ... دندن ...... دندن .... مش قادر يقف ... رجليه فيها نزيف ودماغه كمان بتنزف .... من ايه ده ؟ اكيد عربيه ضربته او كلب عضه او خناقة قطط متوحشة ........طيب يشرب لبن وبعدين اوديه لدكتور ،، احنا لسة بدري ... مش قادر يشرب لسانه متعور ....... حالته صعبة ،، مش عارفة اعمل ايه؟ هروح الشغل وارجع اجيبله مضاد حيوي وبكره اوديه للدكتور لو متحسنش .....

ـ الو ايوة ,, ماتجبيش معاكي مضاد حيوي...

ـ ليه؟

ـ بابا جاب من الصيدلية اللي تحت البيت

ـ اوك ماشي وكله تمام؟

ـ اه كله تمام ... هتتاخري ؟

ـ لأ انا في السكة اهه.. مسافة السكة ...سلام

يااااااااااااااااااااااااااااه

فرحت اوي إن بابا بيهتم بالقط بتاعي وكنت سعيدة جدا ...

حلو اوي ان اهالينا مهما كبرنا يعاملونا كإننا لسة اطفال

قعدت افكر بقي انه اول ما يخف من تعبه اروح جري اوديه لعروسته اكيد مامتها هتتصل وتقوللي ايه اخبار العريس ومش هينفع اقولها عللي فيه .. خلاص يومين وكله يبقي إشطه

اول ما دخلت نديت عليه .... دندن ..دندن... مردش عليا

فين دندن يا ماما ؟ فين دندن يا بابا ؟ فين دندن جماعة ؟

ومين اداله المضاد الحيوي وجبتوه من اي نوع؟

محدش بيرد ليه ؟؟؟؟؟؟ ردوا علياااااااااااااااااااااااا

دندن مات

ملحقش يتجوز

معملتلوش عيد ميلاد

مات من سنة ولسة فاكرة كل حاجة معاة

دندن .... للأبد انت وبس مفيش قط تاني هيسكن معايا

اليوم السابع

ايه ده هوه دندن بقي متوحش كده ليه ، صوته عامل كده ليه ،

مش عارفين نناااااااااااااام

كل يوم اسمع البقين دول من ماما او بابا او اخويا ،، انا كمان كنت بدات اتضايق منه لأنه حاول كام مرة يهرب واطلع اجيبه من عند الجيران ، وبعدين يا دندن بقي !!، انت اتحسدت ولا ايه ؟؟؟ كنت هادي وطيوب ايه العمل ؟

ابن الجيران عرض عليا يشتريه مني !! مين يبيع ضناه ، لااااااا انا مش هسكت انا هوديه عند البت سنو والامر يمشي ،،

في يوم صحيت الصبح علشان اروح الشغل ملقتش دندن جنبي قلت يمكن في البلكونة ، وعلشان اتاخرت علي مواعيدي ، نزلت من غير ما اشوفه ،،

المجرم لقيته نايم علي السلم شلته ولأول مرة مديت ايدي عليه وضربته علشان ميعملش كده تاني ،، نفس الحركة اتعملت تاني يوم وكأنه بيعاندني ،، بس المرة دي جيت اخده ، جري مني وكان الصبح وقلتله انا مش هجري وراك،، قلت هيلف ويرجعلي ... بس الامراض والعدوي ...!!! لأ ... رجعت جبته وطلعته وقفلت الباب كويس وكإني بالظبط بدأت أحبسه ،، غصب عني والله العظيم خايفة عليه وهوا مش حاسس باللي انا بعمله علشانه ،، ومن يوميها دندن اتغير اول الباب ما يتفتح يجري يقف عالباب ،، ويبص يمين وشمال ولو مفيش حد جنبه ييجي طاير علي فوق .. عرفت بيقعد فين ..كنت بسيبه ساعات يغير جو شويه واطلع اجيبه ،

لحد ما في يوم رحت اجيبه ملقتهوش ، قلبي اتقبض قلت ايه ده مين خده؟؟؟؟؟؟

الناس كلها عارفة ان ده بتاعي ولا يمكن حد ياخده مني ، دورت عليه وطلعت عند كل الجيران وسألت المحلات اللي تحت البيت قالوا ماشفناهوش .....يا خبر دندن تاه ،، اتسرق ،، هرب ،، طيب هياكل ايه لا ليه في الفيران ولا ليه في الزبالة ،،

اه يا دندن القط لما ترجع ، هتشوف هعمل فيك ايه

فات يوم والتاني والتالت والرابع والايام بتعدي بدموع وحزن ده دندون يا جماعة ،، دورت عليه في كل مكان لحد ما جالي احساس انه مات

معقولة ... لسة عيد ميلاده كمان شهرين .. سنتين إلا شهرين ،، الاولاد الصغيرين في العيلة هيحضروا عيد الميلاد ،، والكبار كمان ، ماهو حبيب الكل !!! دندن..

جالي اكتئاب لمده سبع ايام ،، اليوم فيهم بشهر ، دماغي هتطق ، بياكل ايه وبيشرب ايه وراح فين واتسرق ولا اتخطف ،، طيب حد يتصل يطلب فدية ..ابداً

وفي اليوم السابع من غياب دندن ،، قابلني علي اول الشارع ابن الجيران وقاللي :

ـ القط بتاعك لقتيه؟

ـ لا لسة.. بس حسيت ان فيه امل ، وبتسأل ليه؟

ـ اصلي شفته النهاردة....

وفجأة كده ظهر قدامي عبد الحليم حافظ في فيلم معبودة الجماهير وراكب بسكلته وبيقول (يا خواني يا هلي يا جيراني انا عاوز اخدكم في احضاني ، يا عنية ياقلبي جري ايه ؟؟ الدنيا احلوت كده ليييه )اه صحيح انا في الشارع وقلت له:

ـ فين وامتي ومتأكد انه دندن ده قط سيامي اصلي واطلعه من بين مليون قط انت ساكت ليه انطق اتكلم ايييييييييه؟

لقيته بيشاور علي السطوح بتاع بيتهم.. طيب راح هناك ازاي ،، قاللي انه شافه من علي سطوح بيتهم وهوا بيجري ورا الحمام علي سطوح البيت اللي جنب بيتنا.....اه انا كده فهمت ، يبقي لما طلع اخر مرة طلع لحد السطوح وقعد يلعب ونسي نفسه ويحتفل بحريته لحد مالقي نفسه في مكان غريب معرفش يرجع تاني ،،

دندن وحشتني ،، دول اول كلمتين قلتهم لما البيه شرف بعد غياب اسبوع عن البيت ،، طبعا خاسس جدااا رغم ان صاحبة البيت اللي جنبنا كانت بتحطله جبنة رومي بس حبيبي بياكل من ايدي وبس ،، ميرسي يا طانط شكرتها وانا فخورة بدندن اللي كان هيموت م الجوع علشان بعيد عني ،، فيه كده يا خواتي ..؟؟

قررت اني اكافأه عللي عمله واشتريت له نص كليو لحمه ليه لوحد (طبعا انااكلت معاه)وضحيت بالميزانية كله علشان دندوني ،

قررت كمان اروح مستشفي الكلب اللي في العباسية يتابعوا التطعيمات وبعدين اوديه لسنو ، علشان كنا خلاص اشترينا عربية ومفيش مشكلة ممكن اشوفه كل يوم لو انا عاوزة.......

ظبطت كل حاجة واتفقت مع ام العروسة علي كل حاجة من اكل وشرب ومعازيم يعني الفرح من كافة شيئ بس محبتش اعمل فيها حماة وادقق في تفاصيل عبيطة كله لمصلحة الولد وبعدين احنا بنشتري نسب برده والولاد بالنص ،، يعني الطمعانين في العيال بتوع الواد ابني يروحو بعيد ،، أُمال اعز الولد ولد الولد

المهم:::::

دندن

مكنش حنون بس ده كان ذكي كمان... كان كل لما يسمع موبايلي بيرن ،، يجري عليا وكإنه بيقوللي قومي ردي حد عاوزك ،، حتي انه كان بيفرق بين صوت تليفوني وصوت اي تليفون تاني ،، مش هتصدقوا ، بس والله حصل .. كان بياكل بسبوسة وكيك وتورتة كمان ،، ولما وديته عند ناس اصحابي ولا رضي ياكل ولا رضي يشرب ، لحد ما رحت خدته ونزل علي الاكل ايه ... حتتك بتتك ، خلصه كله وبقيت فخورة بيه قدام الناس علشان بقي عندي حاجة بتاعتي لوحدي محدش هيشاركني فيها ،
المهم :::
كبر دندونة وبقي راجل أأأأقصد قط ... رغم اني كنت بحسبه بنت في الاول ، وظهرت عليه حاجات غريبة شوية ،مثلا .. لما يسمع نونوة في الشارع ينط علي البلكونة وينادي هوا كمان ، نفسه اتسدت عن الأكل ،، وخس كتير ،، ده كان وصل وزنه 4 كيلو بقي 3 كيلو بس ، ولا بقي يهزر ولا بقي يجري ويطنطط وكان كده عمره سنة ونص تقريبا

قلت اوديه لدكتور ،، صاحبتي قالتلي من غير ما توديه لدكاترة دي اعراض جواز .. اعراض ايه .. ايوة المفروض دندن يجيلوا دندنة ويكونوا أسرة ويجيبوا دنادين صغيرين يبهدلوا الشقة وبي بي في كل مكان ولو الست دندنة عندها اسهال ومش واخدة علي الحمام بتاعنا يبقي نعزل أحسن ونسيبلهم الشقة ،، ماهي مش عيشة دي ومبقاش شاغل دماغي غير دندن وأسرته الصغيرة ،، صحيت في يوم قمت كلمت جوز بنت خالتي دكتور بيطري وحكيت له الحكاية ، قاللي لو مضايقك الموضوع ده بعملية بسيطة ممكن نخليه .. اييييه؟؟

لأ طبعا لا يمكن ده حتي حرام عليا ،، د كائن ودي غريزة عنده انا هدورله علي قطة متربية بنت قطط من عيلة تعفة من النونوة علي قطط الشوارع ايوة ... هية دي الاصول

وبدأت رحلة البحث عن ناو ناو تليق بدندن بيه ، وجدتها ،، الدكتورة صاحبة اختي عندها بنوتة أأقصد أطؤوطة اسمها سنو يعني تلج قلت اوك وهو المطلوب ،، وشديت الرحال للمهندسين علشان اجيب عروسة للعريس المتين ،، الاقي الست سنو هانم مش راضية تيجي معايا ،، بتقولوا ايه يا ولاد ،، ده اللي حصل اصلها مش بتشوف الشارع خالص لو عاوزين يعني ولابد ، تجيبوا سي الافندي بتاعكوا هنا ،، وكده يعني

وعنها وقلت لا والله يا في بيتي يا لأ وانا عرف هيأكلوه ولا لأه ولا هيبهدلوه ولا هينيموه فين لألأألأألأأ

دندن في بيتي معزز مكرم ولا يخرج من داره وبعدين ياعالم يقعد يومين تلاته اسبوع وهوه وشطارته بقي لحد ما نضمن ان الانسة سنو بقت حامل ،، عنها ومكدبتش خبر واتصلت تاني بجوز بنت خالتي واتصل عليه ويكنسلني واتصل ويكنسل واتصل ويكنسل ،، لحد مارد عليا بذوق وقاللي فييييييييييه ايييييييييييييييييييه؟؟؟؟؟

انا قلتله الحقني مش لاقية عروسة لندن!!! دندن مين؟؟

دندن القط بتاعي

اه معلش انا في مؤتمر

معلش اصلي مش بنام طول الليل

لييييييييييييييييييييييييه

اصله بيعمل اصوات غريبة وعمال ينونو بصوت عالي ومش عارفة انام

ينفع تكلميني كمان شوية؟

لا والله اصلي بكلمك من الشغل وهروح دلوقتي

طيب خليكي معايا...

قلت لنفسي احسن اكون معطلاه ولا حاجة ولا عنده حاجة مهمة .. اقفل واكلمه تاني بعدين

لقيته بيقوللي علي العموم انا فضيتلك خالص اعتذرت عن مشاركتي في المؤتمر ... بصي ياستي انا عندي حل كويس بصيت لقيت المدير بتاعي بينادي عليا قلتله طيب سلام دلوقتي وأكلمك بكرة وقفلت السكة..

عرفت بعد كده انه غير رقم تليفونه ومش ناوي يدي الرقم حتي لمراته

اللي هيا بنت خالتي

طيب،، القط سكت ...ولا بينونو ولا بيعمل حاجة من الحاجات دي ايه اللي حصل؟ اتصلت بجوز بنت خالتي في البيت يوم اجازته وفهمت منه ان القطط ليهم مواسم للتزاوج مش طول السنة.. اتاري موسم التزاوج عدي خلاص ... ارتحت وقلت لجوز بنت خالتي سلملي علي بنت خالتي وأكلمكم الموسم الجاي ..، طبعا انا سيرتي بقت علي لسان كل العيلة واتشهرت بالهيافة والفراغ ،، ميعرفوش دندونة عندي ايه،، المهم

عيد ميلاد دندونه قرب وموسم التزاوج قرب ،، هقابل مشكلة ...قمت رفعت راية التأهب القصوي في البيت لاستقبال عروسة ميمونة في المنزل

صديقي الانتيم

Created by Crazyprofile.com

جالي هدية في عيد ميلادي ، كان عمره اسبوعين بس ، كان لونه بيج فاتح وكاكاوي وعنيه زرقة زي المية اللي بشوفها في التليفزيون كده ، كنت عارفه انه هيسبب مشاكل كتير بوجوده في البيت ، بس جمال عنيه وحجمه النونو شجع كل الموجودين علي الاهتمام بيه والحمد لله الكل حبوه، مش بس عنيه لكن كمان شقاوته رغم صغر سنه ... كبر معايا مكنتش باكل غير لما ياكل ولما ارجع البيت بعد عناء يوم كامل هوه يكون اول المرحبين ،، ولما اندهله يجيني ولو كان في اخر الدنيا ،، حبيبي كان عارف صوتي وكان بيعرف الضيوف من اصحاب البيت ويرحب بيهم
كنت بحبه ولسة بحبه ،، هوه صديقي الانتيم ،، ياما نمت في حضنه ودفاني بحنانه وصوته اللي عامل زي الفيبريشن ،، وياما نط علي رجلي يعضني علشان نسيت اجيبله اكل او نسيت اندهله اول لما ادخل ... كانت اكلته المفضلة السمك ،، ياكل سمك من هنا ومحدش يعرف له طريق من هنا ،، ضحكت كتير من قلبي معاه وخرجنا مع بعض كتير ،، اتعاكس في الشارع من كل الولاد والبنات كانت الناس كلها بتسألني عليه ،، اسمه دِندِن (بكسر الدال)... اسم طفلة فليبينية كانت أمورة جدا وحلوة خالص .
لقيت معاه حاجات كتير مش موجودة في البني ادمين ، كان مخلص ومش حرامي ومؤدب وبيفهم ، لما اخدوه ناس اصحابي علشان كنت مسافرة ،، مرضيش ياكل ولا يشرب .....
بس حصلت حاجة فظيعة...

ساعتك في ايدك كام؟

الملل .... مرض العصر

مالك ؟؟ ـ زهقان

مالك ؟؟ ـ طهقان

مالك ؟؟ ـ متضايق

مالك؟؟ ـ مش مبسوط كده ومخنوق

مالك؟؟ ـ مش أد كده

مالك؟؟ ـ مش متظبط

مالك؟؟ ـ يعني .. مش اوي

مالك ؟؟ يووووه أرفان مش رايق

إذن.............

انت مصاب بمرض العصر وهو الملل

تري كيف نعالج هذا المرض ؟

البعض يري انه بتغيير الجو والاماكن والناس يمكن ان نتغلب علي الشعور بالملل

لكن اخرين يشعرون بالملل بمجرد مرور ساعات قليلة دون تغيير ،

ما هو الحل اذا؟

فمثلا إذا حُكم عليك ان تظل ببيتك لمدة شهر دون ان تخرج من باب منزلك... "لا قدر الله طبعا" كيف سيكون التصرف ؟، وما هي الادوات التي ستوفرها قبل جلوسك بمفردك في منزلك لمدة شهر بدون انترنت .. تُري هل انا وحدي المصابة بذلك المرض ؟ حيث انني اشعر بالملل بسرعة وفي اوقات متفاوتة وانه ليس دائما يتاح لي تغيير المكان او السفر ،، وحتي احيانا الاماكن المفضلة لديَ من كثرة تكرار زيارتها اشعر بالملل منها ...كثيرا ما أمل عملي ،، وأمل حجرتي ،،أمل دراستي ، تعالوا معايا نفضفض شوية وننصح بعض نعمل ايه ويمكن اللي مش بيعاني من الملل يقابله صديق عنده ملل يقوم يعديه بالملل ويقول ايه الملل ده انا مليت

متي تشعر بالملل؟

كيف تتغلب علي الشعور بالملل؟

يلا يلا يلا.........

at first

اول بوست ليا

وبعد دروس ومذاكرة في كيفية انشاء بلوجر ، ارسل لكل من يدخل لي الفين سلام وتحية ، واوعدكم افكرلكم في افكار عاقلة ومجنونة وتشاركوني افكاري واشارككم تعليقاتكم

سلام مؤقت